廁紙是這個世界上最貴重的禮物吧？

“叮咚——”時間係夜晚八點半，大部分嘅香港人剛剛食完飯。我打開門，極不耐煩：“點啊你？雀仔嚟嘎？直腸直肚，果頭食完果頭屙啊？”
“喂！女仔講說話嚟講，你都算難聽。快啲開門啦，有禮物俾你，好重。”
趟閘之後，眼前嘅男人西裝骨骨，兩邊手個戚住一條紙巾：“今日好多人搶紙巾啊。”
我反咗個白眼，然後坐翻係梳發上面繼續玩我嘅電話：”你唔係都咁無聊去同啲阿嬸搶阿嘛？“
佢一邊行入屋，一邊好自然咁放低兩條廁紙，換埋拖鞋：”冇啊，係公司啲清潔姐姐搶完，順手俾咗兩條我。“完全係一副自戀覺得自己係全天下最靚仔嘅表情。
“tempo蜜桃味嘎，好香嘎！“
”哦.......你都知道自己爆石臭啦？“
佢搵咗張凳咗係我對面。“臭得過你把口？對你好啲唔該都冇句嘅。”
“最後米又係你用翻。”瞄咗一眼地下兩條廁紙，“點啊？你使唔使攞翻一條翻屋企，你屋企咁多人。”
“唔啦，男人老狗要買呢啲嘢翻屋企嘅咩？如果你唔好意思要曬兩條，我就係你屋企換一條走啦！”
“點解啊？”
“你女仔人家，用香啲嘎啦。咁其他男人上嚟都覺得你精緻啲。成身佬除，嚇死人咩。”
點解呢個人，可以令我無時無刻都想伸手想打佢？“你就成身佬除！”
伸出嘅手，係半空之中俾人扼住。
”都叫你唔好咁粗魯咯。女仔人家斯文啲啦？好唔好？“
”收皮！“掙扎之後收翻手，揮動嘅一刻，空氣中隱隱約約有另一種味道。”喂？你今日去咗溝女啊？有啲香水味喔。“我放低手機，饒有興致睇住眼前嘅人，連頭都忍唔住，向前一伸，想談個究竟。”點啊？條女索唔索噶？點識嘎？係咪之前約你去游水果條？“
”哈？你唔係以為我話禮物俾你？係紙巾掛？“佢打開個書包，係裡面攞出一個包得四四正正嘅禮物盒，遞咗過嚟。“送俾你嘎。”
“咁有心？咁我就多謝啦。”女仔應該都係鍾意收禮物嘅，尤其係意外驚喜。正當我打開個盒之後，發現......裡面仲有另一個盒。根據呢條友仔平時嘅行為，我開始有啲鄒眉頭。
“繼續開啦，我怕會打碎所以加多咗個盒！”
人與人之間或者最重要嘅就係信任......唔可以時時刻刻都疑心人地嘅，於是我再俾一次機會佢：“係米嘎？”
又有一個盒！佢主動幫我拉開第三個盒上面嘅絲帶：“我見呢個盒又幾靚，想俾你睇，米放埋入去咯。”
“……大佬，其實你係咪玩我嘎？開都最後，會唔會係一個有香味嘅盒？”
“點會呢，開埋呢次，最後呢次，一定有嘅。”
我聽佢說話.....又開咗一次，結果發現，裡面真係有，一個長寬高各3cm嘅盒裡面，放住一支sample。
仲未等我發爛渣，佢已經搶先一步開口，就好似二戰諾曼第戰役嘅英美加盟軍率先搶灘咁：“公司最近接到一個新project，要做個香水廣告。我見味道又幾好聞，米帶翻嚟俾你咯。如果你覺得唔好意思有壓力嘅話，可以用完之後講啲感受俾我聽，豐富一下我份proposal ”